عمومي معلومات
مونږ یوه غیر دولتي ټولنه یاستو چې موخه مو یوازې د انساني مرستو رسول تر اړمنو انسانانو پورې دی ، هغوې که په هره عقیده، دین، رنګ او ژبې پورې تړاو ولري زمونږ لپاره بې تفاوته ده.
په اتریش کې موږ تراوسه رسمي دفتر نه لرو ، خو افغانستان کې زمونږ دفتر شته ، چې دفتر برسیره د ګودام په توګه هم کار تری اخلو . په اتریش کې ، موږ دا مهال درې رسمي او په افغانستان کې نهه کارمندان لرو ، خو تر دې دمه زموږ ټول کارمندان پرته له معاش کار کوي.
مونږ نه پروفیسران ،نه ډاکتران او نه هم انجینران یاستو ، مونږ هغه کسان یاستو چې د اړمنو انسانانو سره د مرستې په موخه مو زړونه له شوق او مینې څخه ډک دي.
مونږ خپله د هغې خلکو له ډلې څخه یاستو چې جنګ، لوږه، ظلم او کډوالي مو تجربه کړی ،مونږ هغه خلک یو چې دکورنیو غړي مو اوس هم په همداسې کړاونو کې ژوند کوي.
مونږ په اوترېش هېواد او افغانستان کې له خپلو افغانانو سره نیږدې اړیکې لرو او د خپلو پیژندګلویو پر بنسټ د ډیرو افغانانو ملاتړ هم له ځان سره لرو.
زمونږ مشورتي ډله کې ښځینه او نارینه تجربه لرونکي مشران، ځوانان، د لوړو زده کړو خاوندان ، کارګران او نور شتون لري چې داړتیا په صورت کې به مونږ ته اړینې مشورې راکوي.
له همدې کبله مونږ پر خپل کار کلک باوری یاستو چې ان شاءالله ستاسې مرستې به په پوره امانتدارۍ سره ستاسې د خوښې سیمو اړمنو کسانو ته ورسوو.
تجربو ښودلې ده چې کومې مرستې د حکومتونو له لارې تر سره کېږې پر هغې کې لاندې ستونزې له ورایه ښکاري.
لومړی: دا مرستې اکثر وخت هغه اړمنو کسانو ته نه رسېږې، کوم چې رښتیا ورته اړ وي.
دوهم: د مرستو استول دومره وخت نیسې چې کله نا کله خو د خلکو ټولې ستونزې حل شوي وی چې دوي مرسته ورسوی.
دریم: د مرستو رسولو باندې دومره لګښت راځي چې د مرستو یوه برخه اړمنو او نور یې په لګښتونو ولګیږي.
له همدې کبله مونږ خپلو مرسته کوونکو ته په ډیر جرآت سره وایو چې ستاسې له پلوه را سپارل شوی پروژه او یا مرستې به په پوره ایماندارۍ او امانتدارۍ سره په ډیر ژر وخت، کم لګښت تر رښتینو اړمنو انسانانو ورسوو او ستاسې د باور لپاره به اړوند ضروري اسناد تاسې ته وړاندې کړو.
زمونږ خیریه ټولنه څو پوړیز دفتر ته اړتیا نلري، لسګونه ګران قیمته موټر هم نه غواړي او په سلګونه او یا لسګونه آمرانو او رییسانو ته هم معاش نه ورکوو، ځکه زمونږ سره د عام ولس ملاتړ شته او مونږ په همدی دلایلو یقینی یاستو چی زمونږ کار به تردولتي پروژو څو ځله ژر، ارزانه، با کیفیته او رښتینو اړمنوته رسېږې.
